اشتقت يا وقتي الفاني لفترة صباي سأمت منّك ومن أيامك الجافيه
ذكرت صبحي بطيشه وانبساطي مساي واخٍ جروحي من فراقه ماهي شافيه
جفاني الضحك بفراقه وطوّل جفاي عن وصل ناسٍ مشاعرها معي دافيه
القلب يغرق جروحي ما يبيّن خفاي لكنّها في ملامح نظرتي طافيه
أقول لا.. لاحدٍ منكم يدوّرِ رجاي أجبرني الوقت اردّد لائي النافيه
يوم البحر كنت أحسبه يوم اطالعه ماي قبل اسبحه واكتشف أسراره الخافيه
ويوم ان أصابع كفوفي أكثر من اصدقاي قليل لكن عيوني بالرضا غافيه
لله معطي ولا تحسب يميني عطاي وافي ولا اقدّم إلا مدّة وافيه
انظر لقدّام ما اطالع بعيني وراي أودّع المقفيه واستقبل اللافيه
وابني بيوت الشعر واسّس قوعد بناي ماني بمن يبتلش بالوزن والقافيه
واشب ناري وغيري يقتبس من سناي وامد بالنور ناسٍ نارهم طافيه
واخدم بنفسي قبل لا يخدمون أخوياي وأنا لو اشّر تكون اشارتي كافيه
ثنتين يقدر بها الانسان يكسب رضاي البسمة الصادقة والنيّة الصافية
وثنتين دايم تسبّب في حياتي شقاي دمع الفقارى وشكل اقدامه الحافيه
يلا عساني ما اجرّب عند ربعي غلاي واسالك الستر والتوفيق والعافيه
