القاهرة - «الخليج»
فاجأت الفنانة المصرية زيزي عادل متابعيها بمقطع فيديو عبر موقع التواصل الاجتماعي، أعلنت فيه اعتزالها الغناء نهائياً، مرجعة السبب إلى أنها تريد أن «تقترب من ربها».
وبدأت زيزي عادل حديثها بالقول: «أنا النهاردة طالعة أقول خبر مهم أخدته في حياتي وهو قرار اعتزالي»، وأضافت: «قررت أسيب مهنة المطربة والقرار أنا مخدتهوش مبارح، أنا وخداه من فترة طويلة جداً، بس يمكن مطلعتش قلت وقتها لأني كنت حابة أتكلم مع نفسي ومع الناس القريبة أوي. الناس القريبة مني عارفين نفسهم ولما قلتلهم على القرار شجعوني ودعموني كمان، ويمكن قرار الاعتزال ده بيبعدني عن أكتر مغريات الحياة وهي الشهرة والأضواء».
وأوضحت: «أنا ببعد عن الفن عشان بقرب من ربنا، والفترة اللي فاتت قربت من ربنا جداً، ولقيت أن القرآن بيقولي إنى لازم أكون ست ملتزمة، وبحاول على قد ما بقدر أكون ملتزمة وهتستغربوا شوية إنى طالعة بشعري ومش محجبة، ويمكن ده لأني لسه ربنا لم ينعم عليا بالحجاب، وبدعي ربنا يتممها عليا، وكل حاجة بتيجي خطوة خطوة ومفيش حاجة بتيجي مرة واحدة».
وقالت زيزي عادل: «أنا عاوزة أقول كمان الفن هو مصدر دخلي ورزقي، وأنا بسيب حاجة بعيش منها وسبتها وعارفة إن ربنا هيرزقني، وأنا راضية جداً عن قراري ومبسوطة جداً بيه وحابة اللي جاي جداً وحاسة إن حياتي اختلفت تماماً».
واختتمت بالقول: «أنا حابة أموت وربنا راضي عني ويمكن دي حاجة كلنا بنتمناها، فأنا مش عارفة هموت إمتى ولكن كل الي عوزاه إني أكون مستعدة لمقابلة ربنا وأقابله وأنا راضية عن نفسي وحياتي وأفعالي، والحمد لله ربنا كرمني والتزمت، وربنا يكرم والتزم أكتر، وادعولي إن ربنا يثبتني على اللي أنا فيه».
