حذر الرئيس المصري عبدالفتاح السيسي، من الانسياق خلف مواقع وصفها بـ«المغرضة» تريد إحداث «فتنة» بين مصر وأشقائها، مؤكداً أن سياسة البلاد تتسم بالاعتدال والتوازن والانضباط الشديد، مشدداً على أن مصر لن تنسى وقفة أشقائها من الدول العربية.
ونقلت وسائل إعلام مصرية عن السيسي قوله: «عاوز أقول بتابع مواقع التواصل، وبشوف إنه ساعات حماس زيادة أو حتى أقول تجاوزات في الكلام مش بتكلم عن موضوعات محلية بتكلم عن موضوعات خاصة بعلاقتنا مع أشقائنا، وده أمر ننتبه إليه كويس».
وأضاف خلال افتتاح مصنع للصناعات الغذائية بمدينة السادات: «أرجو إننا نخلي بالنا بتعكس مدى فهمنا، ومدى تقديرنا للعلاقات مع الأشقاء، وبالتالي لما يبقا فيه موضوع يتم تداوله بدون أساس وملوش خلفية بنقعد ونتكلم أمور قد لا يكون لها أساس من الصحة طيب ليه؟».
وتابع الرئيس المصري:«هنمشي ليه وراء بعض المواقع المغرضة اللي عاوزة تعمل فتنة بينا وبين الأشقاء؟ أقل حاجة نعملها نسكت إن مكوناش نقول كلام طيب نسكت. حتى وسائل إعلامنا اللي احنا مش بنتدخل فيها..احنا مش بنكتب إلا دايماً لصالح تحسين ودعم العلاقات مش العكس، مشدداً على علاقة مصر طيبة بالجميع، منذ توليه المسؤولية، باعتباره نهج دولة حتى في الأزمات والخلافات».
وتابع الرئيس السيسي: «احنا دايما مفيش تصريحات سلبية ومنضبطة جداً، وميصحش نسيء لأشقائنا ومننساش وقفة اشقائنا معانا.. لو فيه أزمة أنا أطول لساني، وأقول كلام مش مظبوط ده كلام لا يليق ابداً..فين لا تنسوا الفضل بينكم.. لما نعمل كده كمواقع تواصل وبعض المقالات اللي أشوفها مع أشقائنا في المملكة العربية السعودية أو أي دولة أخرى.. لا لا احنا حريصين وده توجه دولة».
وأضاف السيسي: «أرجو كمواطنين ننتبه إن احنا لا ننساق وراء مواقع تريد الفتنة بيننا، وعلاقتنا طيبة بالجميع وحتى في أصعب الظروف. ومش عاوز أقول أسماء دول لأن الأمور كلها تجاوزناها، وكنت عارف كده، ولو كان فيه خلاف مع دولة شقيقة خلال السنين اللي فاتت، كنت عارف إننا هنتجاوزها، حتى الأزمة مع إثيوبيا في سد النهضة بتلاحظوا إننا مابنقولش كلمة واحدة تسيء».
وأكمل السيسي: «إذا مكوناش نقول حاجة جيدة منقولش، ولو مش هنبني منهدّش، أرجو ناخد بالنا قوي وأرجو مواقع التواصل وساعات بلاقي بعض الزملاء في الإعلام لو فيه خط وتصريح هنقوله كدولة بشكل رسمي، ولو مقولناش ده يبقا الأمور ماشية طيبة..طيب يبقا نبني ونسيء ولا نحسن ونخلي بالنا يعني».
