أموت وأعرف شو مشكلة نادي النصر من عقب سالفة فاندرلي والفريق (ما ترقع) تحس كأنه لعنه ونزلت على النادي، من عقب هذي المصيبة والنصر اللي كنا متوقعين منه هالسنة الكثير وعقب المستوى اللي قدمه العام الماضي واللي قدمه في التصفيات الآسيوية قلنا العميد بياكل اليابس والخضر، وكان ماشي صح لين ما أظهرت مشكلة المنحوس (فاندرلي) والبلاوي بدت تظهر من عقب السالفة البايخة، واستغربنا من ردة فعل النادي وبروده ومن هدوء اتحاد الكره لين ما اتضحت الصورة، وعرفنا القصة ومن وراها ومنو ورط النادي بسالفة فاندرلي وضيع كل أحلام النادي وطموحات جماهيره بغلطة ما كان لها داعي أبداً، وعقبها النادي (كل ما قطع سيح ياه وادي) لين ما طاحت البلاوي براس المدرب الفقير وطيرّوه.
ما علينا من كل هالسوالف، اللي صار صار وطاح الفاس في الراس، وتجربة ذقنا مرارتها وإن شاء الله ما تتكرر ولا نبغي نرمس فيها زيادة رغم الحقايق اللي الكل عارفها، لكن السؤال؟ لين متى بنتم نهاذي ابفاندرلي وغيابه، ذبحتونا بفاندرلي، فاندرلي راح وفاندرلي رجع، بنسجله في الانتفالات الشتوية، ما بنسجله في النهاية ترى لاعب عادي والنصر أكبر منه ومن غيره، حسستونا أنه (ميسي) والا (كريستيانو) والنتايج مربوطة بوجوده، فضوها سيره وريحونا وريحوا جمهوركم المغلوب على أمره وإذا كان على سالفة الخروج من البطولة الآسيوية ترى الموضوع عادي جداً، لأنكم ما وصلتوا للنهائي عشان تتحسفون على ضياعها، كل هالحسافة وكان جدامكم أربع مباريات ذهاب وإياب مع العين والفريق الكوري والمفروض اللي يتحسف كل هالحسافة العين مب انتو، لأن العين فقد البطولة بعد ما كان شعره بينه وبينها ، وفوق كل هذا رجع للدوري وفاز في مباراتين ونسى البطولة والا شو رايكم؟!
وفي النهاية أنا أتوقع اللي حصل لكم (حسد) أو عين ما صلت على النبي، لأن الموضوع ماله تفسير ثاني وعلامات (العين) معروفة:
بوصفار، سخونة، تعّرق، سرعة خفقان القلب، الجسم ما يتقبل العلاج، الانعزال عن الناس، والضيقة.
وأعراض الحسد:
العزلة، عدم الاهتمام بالمظهر، الخمول، التنهد والكسل، قلة النوم، عدم التركيز.
واللي يبتلي بهالأشياء عليه بالرقية الشرعية، وما تشوفون شر إن شاء الله.
